Ég ætla, eins og ég hef sagt, að segja frá sjaldséðum geisladiskum sem ég á í fórum mínum. Í dag ætla ég að taka fyrir söngleikjadisk sem var mér mjög kær í nokkur ár.
Ég keypti diskinn fyrir tilviljun á Amazon. Ég hef ekki séð söngleikinn en ég hef forvitnast um söguþráðinn á netinu.

Söngleikurinn heitir Ruthless. Hann fjallar um átta ára stelpu, Tinu Denmark, sem er hrikalega hæfileikarík, syngur og dansar allan daginn. Mamma Tinu er aftur á móti hæfileikalaus og lifir fyrir dóttur sína. Æðsti draumur Tinu er að fá að leika Línu Langsokk í leiksýningu skólans. Kennarinn sem velur í hlutverkið er hins vegar bitur leikkona sem er full af fróðleik um hvað lífið er erfitt. Hún vill endilega að barnið fái að kynnast sárindum heimsins strax í þriðja bekk og eftirlætur laglausustu og heimskustu stelpunni í skólanum hlutverk Línu.
Tina drepur laglausu stelpuna og er send á heimavistarskóla Daisy Clover fyrir geðsjúkar ljóskur. Á meðan uppgötvar mamman leynda hæfileika sína og slær í gegn sem Broadway stjarna. Mömmunni og Tinu sinnast út af þessu en í lokin sættast þær og syngja saman.
Ef maður hefur á annað borð gaman að söngleikjum þá er þessi diskur mesta gersemi sem finnst á jörðinni.

Ef mér skjátlast ekki þá lék Britney Spears í einhverri uppfærslu af leikritinu löngu áður en hún sló sjálf í gegn í einhverju litlu leikhúsi. Á disknum syngur þó Lindsay Ridgeway Tinu en ekki Britney Spears svo óaðdáendur þurfa engu að kvíða ef þeir kaupa sér diskinn.