Jæja. Í dag gekk ég um garð Versala í 45 stiga hita. Það er sjúklegt.

Ég hef komist að því að stundum er mjög erfitt að halda athygli í kennslustundum. Það er þegar maður getur ekki tjáð sig nógu vel til að spyrja nánar út í eitthvað. Þegar ég spurði til dæmis frönskukennarann minn hérna úti í Frakklandi hvernig blogg er á frönsku þá þurfti ég að halda mjög langan fyrirlestur með teikningum og öllum aukahlutum til að reyna að útskýra hvað blogg er. Eftir hálftíma stam og asnalegheit komst ég að því að kennarinn hafði mjög líklega aldrei heyrt um blogg áður. Já það eru ekki allir kennarar sem blogga. Ég held líka að kennarar í Frakklandi fái meira út úr því að gera grín að nemendum sem skilja ekki efnið heldur en íslenskir. Það kemur auðvitað aftur að því að það er ekki jafn mikil virðing borin fyrir kennurum á Íslandi og í Frakklandi.
Ég vona nú samt að ég verði ekki jafn óróleg í skólanum í vetur og hérna úti. Ég vona líka að óróleikinn stafi frekar af hita en heimsku, en maður fær kannski ekki allt sem maður vill.
Hugsanirnar mínar eru ennþá sólbrenndar eftir daginn, eins og bakið á mér, svo ég stíg ekki í vitið.
Kanakonurnar í skólanum mínum eru ósköp vænar. Samt finnst þeim hið sérstæða áhugamál flokksins sem þær kusu, að auðvelda þeim sem lögðu í kosningasjóðinn að eyða allri náttúru í heiminum, ekki til marks um að flokkurinn leggi litla áherslu á náttúruvernd. ,,Það er svo mikil alhæfing" sögðu þær eins og klipptar úr bandarísku tímariti með sálfræðiívafi. Þessu komst ég að þegar ég skaut því inn í einhverja umræðu að bandaríska ríkisstjórnin væri ekki beinlínis HLYNNT náttúrunni, svona í megindráttum.
Þessar konur virtust í undangenginni umræðu leggja mikla áherslu á að vernda umhverfið og fleiri mál mjög tengd. Og hvernig er það, eru engin tengsl á milli skoðana fólks og þess sem það kýs þarna utar? Minnir mig á herstöðvaandstæðinga í Samfylkingunni.
Önnur kona, næstum Kani (frá Kanada), sagði að sér þættu vandamál plánetunnar vera frekar fátækum löndum að kenna en ríkum því að ríkt fólk borgaði að minnsta kosti fyrir sinn skerf. < Þegar hingað var komið í samræðunni ákvað ég að horfa út um gluggann endrum og sinnum og þykjast vera mjög víðsýn og skilja málstað þeirra algjörlega.