Mig langar til að deila með ykkur eldgamalli tilvitnun, síðan MH keppti gegn Verzló í Gettu betur, sem mér var einhvern tímann bent á. Tilvitnunin er tekin af síðu eins meðlims verzlóliðsins, Stefáns Einars.
Það voru nokkur atriði sem hægt er að setja út á hvað varðar útsendinguna í gær, í fyrsta lagi voru einstaklingar í stuðningsliði Mh-inga sem hegðuðu sér mjög illa og létu út úr sér hluti sem áttu ekki heima á keppni sem þessari. Við því er ekkert að gera. Persónulega hefði ég kallað á geðlækni fyrir Uglu Egilsdóttur, hina ungu leikkonu, ef ég hefði ekki verið að keppa eftir að hafa fylgst með henni í klappliðinu en það þarf greinileg að taka eitthvað á hennar málum.
Ég hef svo gaman að því þegar fólk hefur umhyggju fyrir náunganum. Það er svo gott þegar fólk hugsar til manns á ögurstundu!
Í dag fór ég í tónlistarsögupróf. Ég er nebbla í áfanga í skólanum sem heitir TOM102, þann áfanga kennir Þorgerður nokkur Ingólfsdóttir. Ég hef sjaldan farið í próf sem ég hef verið jafn ómeðvituð um hvaða námsefni ég gat raunar notað til undirbúnings. Jú reyndar, þegar ég fór í próf úr franskri léttlestrarbók sem ég tók í p áfanganum sem ég er í (FRA203). Ég las bókina á miklu spani. Ég var rosalega stressuð yfir því að falla á prófinu. Ég var nefnilega nýbúin að leika í skólaleikritinu mínu og lærdómurinn sat sem fastast á hakanum (ekki það að ég hafi tekið mig á eftir það....). Ég glósaði alla bókina og lærði á meðan fallshrollurinn lak niður eftir bakinu. Yfir nóttina mögnuðust martraðirnar, enda var prófið í fyrsta tíma og ég vís með að sofa yfir mig eða missa af strætó. Mér féllust hendur þegar ég nálgaðist skólastofuna og bjó mig undir níðþungt ritgerðarpróf þar sem ég mundi fara að grenja úr taugaáfalli. Prófið reyndist svo vera lauflétt krossapróf sem tók fimm mínútur.
Mig langar til að læra á orgel og vera nákvæmlega eins og mamma mín. Þess má til gamans geta að mamma mín var orgelleikari í fangelsum á sínum yngri árum. Ha, í alvöru?
Ja-á! Mamma mín fór sko túrinn á milli allra fangelsanna á svæðinu á öllum hátíðum, jólum og páskum og spilaði hámenningarlega tónlist á orgel fyrir synduga mennina. Orgel er nefnilega meiriháttar stórkostlegt hljóðfæri og það veit hún mamma mín betur en margir aðrir. Þess má líka til gamans geta að ég á eina pípu í Hallgrímskirkjuorgeli. Hana fékk ég í afmælisgjöf og hún heitir U.