Ég er nýkomin af kosningum til embætta og ráða innan nemendafélags MH. Það var mjög gaman. Ég bauð mig ekki fram í neitt vegna þess að ég ætla að mynda nýja nefnd sem á að sjá um að búa til tungumál fyrir emmháinga, einhvers konar emmhísku. Nema hvað! Meðstjórnandinn fráfarandi var að uppfylla kosningaloforð sín með því að velja emmháing mánaðarins fyrir ansi marga mánuði. Ragnheiður Gröndal hin stórkostlega söngkona var emmháingur febrúarmánaðar, Hildigunnur og Andri, sem kepptu fyrir hönd Emmhá í söngvakeppninni á Akureyri voru líka Emmháingar mánaðarins og ég og Íris vorum emmháingar janúarmánaðar fyrir Brandarablaðið okkar og fengum mikilfengleg málverk að launum. Ég varð svo óumræðanlega hrærð að ég kom ekki upp orði, sama gilti um Írisi. Emmháingar ársins voru svo drengirnir Beggi og Hjalti.
En á morgun fer ég til Akureyrar með kór Menntaskólans við Hamrahlíð og ég vona að það verði svo gaman að hjartaspeglar tára minna fái þar einhverja lausn sára sinna.